بکير نبي‌اوغلو
کؤچوره ن: ع. آق‌گونئيلی
اثرلري‌ايله ابديله شه ن صنعتکارلار آراسيندا ائله نادير سيمالار وار کي, نورلو ايدئال يوْلوندا, خالق آزادليغي, بشر سعادتي اوغروندا موباريزده بيلاواسيطه گؤسته ردييي موستثنا قهرمانليغي ايله ده آدي تاريخين قيزيل صحيفهلرينه حک اوْلونور, قديرشوناس اينسانلار اونلاري نسيل- نسيل درين ائحتيرام دويغوسو ايله ياد ائديرلر.
۱۹۷۱ - ينجي ايل, مارت آيينين اووللرينده جنوبي آذربايجان`ين مشهور اينقلابچي شاعيري عليرضا نابدل اوختاي دا بئله‌جه موستثنا قهرمانليغي ايله اؤز شرفلي آديني بوتون دونيادا تانينان اؤلومسوز صنعتکارلارين جرگهسينه يازدي........... 28 ايل عؤمور سورموش بو پاک اينسانين, آلوْولو وطنپرورين, گؤزهل شاعيرين موباريز حيات و ياراديجيليق يوْلو وار. تئهران`ين «رفعت» نشرييياتيندا چاپ اولونموش «ايشيق» آدلي شئعرلر کيتابيني اوخويارکن بو قناعتيميز داها دا مؤحکمله‌نير.
ع. اوختاي ۱۹۴۳ -نجو ايل ده آنادان اولموشدور. اونون اوشاقليق, ايلک گنجليک ايللري قوووتلي شئعر, صنعت و اينقلابي موباريزه عنعنهلريايله مشهور اولان تبريزده کئچميشدير. تئهران اونيوئرسئتي‌نين حوقوق فاکولتهسيني بيتيرميش, لاکين ايختيصاصي اوزره چاليشماق ايمکاني وئريلمهديييندن, خوي شهه رينده موعلليمليکله مشغول اوْلموشدور. خالقي قارتيميش شاه رئژيمينين ظولموندن و ايمپئرياليست تأثيريندن آزاد گؤرمک آرزوسو ايله گنج شاعير، جنوبي آذربايجان ميللي آزادليق حرکاتينا قوشولور. ايران خالق فدائي‌لري تشکيلاتينين تبريز اؤزهيينين (شٶعبهسينين) ياراديلماسيندا بٶيوک فعالليق گؤسته رير. ظولمه, ايستيثمارا, ميللي اسارهته قارشي داخيلي نيفرت, خاراکتئريندهکي ثبات و قطعييت، ايجتيماعي اينکيشافين قانونا اويغونلوقلاريني, سياسي نظرييهلر تاريخيني و ......ني ياخشي بيلمهسي سايهسينده، ع. اوختاي تئزليکله بو اؤزهيين ان نفوذلو رهبرلريندن بيري اولور. ..........................................................................
تئهران`ين پامنار منطقهسينده اينتيباه نامه يايارکن شاه`ين خفييه‌لري ايله قارشيلاشان و غئيري برابر ووروشما زاماني آغير يارالانان ع. اوختاي، دوشمنلرين الينه کئچير. اونا آغير ايشکنجه وئريب، منسوب اولدوغو تشکيلات و يولداشلاري حاققيندا معلومات قوپارماق ايسته‌ييرلرسه ده، نتيجهسيز قالير. ايشکنجهلر آراسينداکي فاصيلهلردن بيرينده جللادلارين باشي‌نين قاريشديغيندان ايستيفاده ائدهن ع. اوختاي ديري- ديري دوشمن الينده قالماماق نييتي ايله ايستينطاق آپاريلان بينانين اوچونجو مرتبهسيندن اؤزونو آتير. برک ازيلير, بير قولو سينير، لاکين اؤلمور. يولداشلاريني اله وئرمه‌مک اوچون اينتيحار ائتمک مقصدي ايله, سون آتيشما زاماني آلديغي و هله بيتيشمه‌ميش ياراسينين تيکيشيني سؤکور, لاکين اونون اوستونو آليرلار. . . ................................... منفور نييتينه چاتمايان ايرتيجاع، شاعيره اؤلوم جزاسي کسير. حؤکم ايجرا ائديله رکن، ع. اوختاي جللادلارا بؤيوک نيفرتيني حاق ايشين غلبه‌سينه سونسوز ايناميني ايفاده ائدهن بير ماهني اوخويور. بلکه ده خالق هاواجاتي پردهسينده اوخودوغو بو سون ماهنينين سؤزلري ائله اونون اوز شئعرلريندن بيري‌ايميش. . ..........
آزربايجان پوئزياسينين آغ ساققالي مودورک "حبيب ساهير" خاطيرهلرينده «موستثنا بير ايستئعدادا ماليک شاعير کيمي قيمتله نديردييي ع. اوختاي حاققيندا درين تأسسوف حيسسي‌ايله يازميشدير کي «بو پارلاق جواهير ايران ايمپئراتورلوغو جللادلاري‌نين ايشکنجهسيندن قورتولا بيلمه‌دي و گنجليک چاغيندا قانينا بوياندي». قوجامان صنعتکار اؤز ناکام قلم و مسلک دوْستونون فاجيعهسينه بوتون اوْخوجولارينين محزون گؤزلري ايله آغلاميش, دوْغما آزربايجان طبيعتينين ده ع. اوختاي`ين عزاسي «ياسي» موناسيبتي ايله درين ماتمه باتديغيني يانا- يانا قلمه آلميش:
بو دورکي داغلار آراسيندا دان يئري آغاريير
و ييرتيلير گئجهنين گؤي ايپک پردهلري. . .
«ايشيق» کيتابيني خالقين کئشمهکئشلي طالئعيني اؤزونه مخصوص اوريژينال بير طرزده عکس ائتديره ن پوئتيک گوزگو آدلانديرماق اولار. ع. اوختاي`ين اثرلرينده خالقين حياتي, اوْنون تاريخي, قارا قوروهلار و ائمپيرياليست قييوملوغونا قارشي موباريزه احوالي- روحييه‌سي، متانت و دؤزومو, گله‌جهيه اينامي ترننوم ائديلير. «پاپاغيم, قيلينجيم و آتيم» شئعريندن آلديغيميز بو ميصراعلاردا اوْلدوغو کيمي:
گون دوشدو يانديرسين, يانماديم
يئل اسدي کؤکومدن قوپارسين, قوْپماديم
گلدي سئل, آپارسين، گئتمه‌ديم.
بو ميصراعلارين هر بيري منفور شاه اوصول-ي ايداره‌سينين موختليف واختلاردا جنوبي آزربايجان بارهسينده حياتا کئچيردييي ضيدد اينساني تدبيرلرين بيرينه ايشارهدير: يعني حوقوقلار آليندي, مکتبلر باغلاندي, آزربايجان ديلي ياساق ائديلدي. . . بوتون بونلارا باخماياراق، کؤک درينده اولدوغو اوچون، خالق محو اوْلمادي، داوام گتيردي, اؤز آنا ديليني عادت- عنعنه‌سيني, معنويياتيني قورودو و ياشاتدي.
ع. اوختاي قوووتلي پوئتيک ايستئعدادا ماليک بير صنعتکار اولموشدور. اوريژينال علامتدار تفککور طرزي, اوبرازلي سؤزون اينجهليکلرينه وارماق, رمزلرده درين معنالار عکس ائتديرمک، اونون ايرثينين ان سجييه‌وي علامتلريندندير. شئعرلرينده طبيعتين آيري- آيري پرئدمئت و حاديثهلري اساسيندا اينسان طالئعلريني عکس ائتديرمک مئيلي تقديره لاييقدير. بير ده گؤرورسه ن کي, شئعرده تصوير اوْلونان باغداکي بوتون آغاجلارين بوداغلاريندان مئيوه عوضينه، ساييسيز- حئسابسيز نيسگيل مونجوقلاري ساللانير. «نيسگيل مونجوقلاري» شئعرينده‌کي بو اسرارانگيز باغ، واختي ايله ايکي قات ظولم و تعقيبلر اليندن درين کدره, بورونموش بوتون اؤلکهنين تيمثالي‌دير.
من آغير بير يوکه م
يولسوز کوچهنين بئلينده:
هانسي تورپاغا
قويلايا بيله‌جکسينيز مني
«هانسي توْرپاغا» شئعريندن آلديغيميز بو پارچادا شاعير تلقين ائدير کي, اگر اينسان يولسوز, مسلکسيز, آمالسيز و عقيده‌سيزديرسه، اونون آيدين مقصدي يوخدورسا, اوزهرينده يئريدييي کوچهسينه‌ده، مئيوهلريندن بهرهله ندييي توْرپاغينا دا آغير بير يوکدور. ع. اوختاي`ين ليريک قهرماني طبيعي, حياتي بير اينکيشاف يوْلو کئچه‌ره ک متينله شميشدير. بير زامان «تنها قاراغاج» شئعرينده درهده بيتميش يالقيز آغاجا اوخشاديلان بو قهرماني، تقريبن بير ايل سوْنرا يازيلميش «ستتارخان آتليلاري» شئعرينده آرتيق خالق اينتيقامچي‌لارينين سيراسيندا دوستلاري، مسلکداشلاري آراسيندا داغ سئلي کيمي کوکرهيه ن گؤروروک:
ايستيبداد قوشونونا
گئديريک, قيرغين سالاق
گئديريک اؤلکهميزي
يادلار اليندن آلاق
«سينيق» شئعرينده , ع. اوختاي آراز اوستوندهکي عئيني آدلي کؤرپونون کيمسهسيز, قريب گؤرکه ميندن پئشمانليق دويغولاري ايله بحث ائدير. لاکين اونون شيمالداکي باجي و قارداشلاري ايله بيرليک حاققيندا قلبيندن کئچه نلر سئيرچي بير آدامين پاسيو دويغولاري دئييل.
بيز يئنه ائللري بورا سسله ريک
بوکولمز بيلکلر قوللار بسله ريک
بو چايي بيز يئنه کؤرپولو‌له ريک
عؤمروموز يئنه ده ازلدن باشلار-
ميصراعلاريندا، ع. اوختاي تاريخين ادبيياتسيز حؤکمونه دوزه‌ليش وئرمک عزم ايله ياشايان «بوکولمه ز بيلکلرين» "آلوولو باشلارين» شاعيري کيمي چيخيش ائدير. اجدادلاري‌نين بير زامان سئمئنت عوضينه گؤز ياشلاريني ايشله ديکلري بو کؤرپونو يئنه ده ساز, جاه- جلاللي، گئت- گللي گؤرمک آرزوسونو قلمه آلماقلا، شاعير بيرليک سعادت آرزولارينين حقيقته چئوريله‌جه‌يي گونو هموطن‌لري‌نين طالئعينده يئني بير مرحلهنين باشلانغيجي کيمي ترننوم ائتميشدير.
کيتابداکي شئعرلرده چاغريش روحو قوووتليدير. ع. اوختاي هر بير غئيرتلي وطن اوْغلونون, سئيراوي زحمت آدامينين عمليندن ظولم سارايينين تمليني سارسيدان بير معنا گؤرور و اونلاري اؤز سعيلريني آرتيرماغا چاغيرير. «ايشيق» شئعرينده اؤلکهنين کوکورد معدنلرينده چاليشانلارا موراجيعت ائديب، اؤز ايشيقلي عمللري ايله ظولمتي کؤکوندن يانديرماغا سسلهيير. پولاد پيچاق حاضيرلايان اوستادان ايسه اونون ديلهيي بودور:
آغ پولاد دان, پولاد تکي سوموکدن
ائله کسگين پيچاقلار يونگيلان کي
ييرتابيلسين ظولمون چيرکين اورهيين
بلکه چوبان آزاد چالا توتهيين.
معلوم اولدوغو کيمين, جنوبي آزربايجان`دا يارانان يئني ادبيياتين گؤرکه ملي نومايندهسي, مشهور آزادليق موجاهيدي "صمد بهرنگي" دوشمن فيتنهسينين قورباني اوْلاراق آراز چاييندا باتيريلميشدي. بو متين اينسانين, آلوولو موباريزين و مشهور خالق صنعتکارينين هلاک اوْلماسي موناسيبتي ايله يازديغي «صمد کونلومدهدير» شئعرينده، ع. اوختاي اينانير کي صمد بهرنگينين اکدييي آزادليق, ايستيقلالييت توخوملاري گؤيه‌ره‌جک, عدالتين قودرتي قارشيسيندا ظولمون سارايي بر باد اوْلاجاق. حاق ايش اوغروندا موباريزه‌ده صمد هميشه دوشمنلره قارشي ووروشانلارين اٶن جرگهسينده گؤرونهجکدير. شاعيرين نظرينده ص. بهرنگي بير ده اونا گؤره عولوي و عزيزدير کي, او خالقيميزين بؤيوک اوغلو صمد وورغون`ون آداشيدير.
نيگاران قالماسين اولدوز`ا دئيين
کؤنلومه آلميشام صمد`ين عشقين
صمد کونلومدهدير، اورهييمدهدير
وورغون`ون آداشي جييه ريمدهدير
اينتيقام آلاجاق ائل دوشمنيندن
اوختاي`ين اثرلرينه قوووتلي بير خلقيليک روحو حاکيمدير. اونلارين خلقيلييي بيرينجي نؤوبهده مولليفين وطن تاريخينين موهوم مرحلهلرينه، خالق معنويياتينين اينجهليکلرينه، آزربايجان خالقينين رئال و افسانهوي قهرمانلارينا ياخيندان بلد اوْلماسي ايله شرطله‌نير. تصادوفي دئييل کي «قيلينج ناغيلي» شئعرينده تصوير اوْلونان نوراني قوجا بو دونيادان کؤچه رکن اؤز ائولادلاري اوچون وار- دؤولت, جواهيرات يوْخ، بابالاردان قالما بير قيلينج ايرث کيمي قويوب گئدير. اؤزو ده بو قيلينج:
دومرول`ون الينده ائو قوران ايميش
کوراوْغلو بئلينده خان قووان ايميش
شاه ايسماعيل چاغي توپ قيران ايميش
ستتارخان`دان بري قالميش قينيندا
تاريخين اصيل ياراديجيسي، بر- بزهکلي سارايلاردا عئيش- عيشرته دالان هارين حؤکمدارلار يوخ, همين سارايلارين داشلارينا ايکينجي حيات وئرميش قابارلي اللرين صاحيبلري, ائل يوْلوندا جانيندان کئچه ن زحمت آداملاريدير. اوناگؤره ده ان عظمتلي سارايلار يالنيز او زامان پاک و اورهک آچاندير کي اوْنلارين ديوارلاري آراسيندا فيرعون طبيعتلي درهبئيلر حؤکمرانليق ائتميرلر. «سولطانييه سارايي» شئعرينده و ديگر اثرلرينده ده ع. اوختاي`ين خالق تاريخينه باخيشي بئلهدير. بير شاعير کيمي ع. اوختاي قلبينده خالق شئعرينه, صنعتينه, ائل سؤزلرينه محببت او قدهر گوجلو ايدي کي دوْغما اوبالاري دولاشارکن ائشيتدييي فوْلکولور نمونهلرينه بيگانه قالابيلمير, اوْنلاري قئيده آلير, حتتا بعضي‌لري‌نين عئينيله اؤزونون گلهجکده نشر ائتديرمک نييتينده اوْلدوغو کيتابينا سالديردي:
قالادان قالايا اوچ قيزل گونبز
هر بيرين دينديرسه ن هئچ بيري دينمه ز
باجيسي گويچه‌يين هئچ اوزو گولمه ز.
آي گئدهن يوْلداشلار, دايانين گليم!
شوخلوق پردهسينده, ظارافات مقاميندا دئييلميش همين ميصراعلارين آخيريندا شاعير بو سؤزلري يازميشدير: «آزربايجان فوْلکولوروندان. زنجان`دا ائشيديلميش قوْشما». خصوصن ع. اوختاي`ين باياتي آدلانديرديغي دؤردلوکلرينده خالق شئعري نمونهلرينه خاص اوْلان ييغجامليق, آهنگدارليق, اينجه‌ليک ديققتي جلب ائدير. بعضن شاعير زرگر دقيقلييي ايله جيلالاديغي دؤرد ميصراعا ائله درين بير معنا آشيلايابيلير کي اونون خالق پوئزيياسيندان مايالانان شئعريني باياتيدان آييرماق چتين اوْلور.
دان يئري سؤکولمکده
قونچهجيکلر گولمکده
دونه ن آچان لالهلر
توْرپاغا تؤکولمکده. . .
بو ميصراعلار, البتته عادي بير طبيعت منظرهسيني تام دقيقلييي ايله عکس ائتديرمک نامينه يازيلميشدير. بيزيم نظريميزده بو دؤردلوک ايجتيماعي, ميللي ظولمدن زارا گليب، فداييلره قوشولان گنج وطن بالالاري آراسيندا شهيد اوْلموشلارين شأنينه يازيلميشدير. بير شئعريندن آلديغيميز بو ميصراعلار کيمي:
داغلار, داغلار. . .
ساپ- ساري زميلر قاليب آغلار.
. . . يئل يئنه اسير سوْلغون بوتالارا
يئل يئنه اسير
ووروشما ميئدانيندا قالان
يارالي بالالارا!؟
خالق ادبيياتينا ياراديجي موناسيبت روحو کيتابداکي «چال آشيق» «اوْغلان اوْخو», «طبيل ماهنيسي» «سئوگيليم اوْلارسان مي!» و ديگر شئعرلر اوچون ده سجييه‌ويدير. سون شئعرده ليريک قهرمان قيزيل گوله، آخار چايا، توپا بولودا, پارلاق اولدوزا, بديرله نميش آيا، باکير دويغولاريني ايظهار ائتسه ده، اوْنلارين هئچ بيرينده اؤز محببتيني تاپابيلمير. بو زامان خالق بديعي تفککورونون اينجيلري اوْنون اليندن توتور:
دورنادان قاناد آلديم,
قانادلانديم اوچماغا,
حاق قاپيسين آچماغا.
حاق قاپيسي کيليدلي
آچار دوه بوينوندا
دوه ميلان يوْلوندا.
ميلان`دا بير قيز گؤردوم
ناردان قيرميزي گؤردوم
حاق قاپيسين او آچدي
گؤزلريم دولدو داشدي
قاشي- گؤزو قاپ- قارا
او قيزين آدي سارا. . .
داغ ووقاريني دا، چاي تميزليييني ده، اولدوز پاريلتيسيني دا، قيزيل گول عطيريني ده اؤزونده تجسسوم ائتديره ن سارا صورتينين بو قدهر جانلي و جاذيبهدار چيخماسيندا هم جنوبدا، همده شيمالدا گئنيش ياييلميش ائل ادبيياتي، شکسيز اؤز نجيب تاثيريني گؤسته رميشدير. بعضن ع. اوختاي حياتين معناسي و گله‌جک حاققيندا فيکيرلرينين موستقيم ايفادهسيني وئرير:
اينسان محکوم اولماياجاق
اينسانييت سولماياجاق
«يورد»
لاکين اوْنون يوکسک درجهده گوجلو شاعيرانه تخييول محصولو اوْلان خاريجي عالمه ظريف, طراوتلي باخيش زمينينده يازيلميش شئعرلري ده چوْخدور. مثلن هامينين مين دفعهلرله موشاهيده ائتدييي عادي بير طبيعت حاديثه- گونشلي بير گونده آخشامين دوشمهسي- «دورنالار کؤچه نده» شئعرينده ع. اوختاي`ين گؤزلري اؤنونده بوتون الوانليغي ايله بئله جيلوه‌له نميشدير:
گونشين آل قاني ظولمت الي‌يله
گون باتان داغلارا ياييلان زامان.
آخشام نسيمينين حزين سسي‌يله
دنيزده لپهلر آييلان زامان. . .
٭٭٭
......... اؤز کيتابينين اوزونو گؤرمهدن ايشيقلي دونيا ايله ويداعلاشان شاعيرين اثرلريني نشره حاضيرلايان دوستلاري، اوْنون آشاغيداکي ميصرالاريني ائپيگراف سئچميشلر:
من محببت يوللاريندا
جان قويماغا يارانميشام
بو گون آراز`ين هر ايکي تايينداکي اوخوجولاري بؤيوک ميننتدارليق دويغوسو ايله دئيه بيله رلر کي ع. اوختاي`ين بير سيرا مودروک کلاملاري کيمي بو سؤزلري ده اؤزونو دوْغرولتموشدور. شاعير باشي مين بير بلالار گؤرسه ده ووقاري اييلمهيه ن، منلييي ايتمهيه ن، صاباحا آيدين نظرلرله باخان سئويملي خالقينا محببتي يولوندا اوْنون بٶيوک سعادتينه، صداقتي يولوندا اؤز جاوان جانيني اسيرگه مهدي؛ ائله بونا گؤره ده ابديييت قازاندي. اوختاي`ين بوتون شئعرلري بو ابدييتين شاعيرانه تصديق اولوب, مولليفينين اورهکلرده اوجالميش هئيکليني بزهيه ن سولماز چيچک دستهسيدير.
عليرضا نابدل، «اوختاي» سؤزونو تخللوص قبول ائتميشدير: اوْخ کيمي دوز, دوشمن باغري دهله ن, اوخاتاي، بئله ده اوْلدو. ع. اوختاي`ين ديللرده ازبر اوْلموش شئعرلرينين هر ميصراعسي آزادليق دوشمن لرينين اورهيينه سانجيلان نيفرت اوخو دئييل مي؟! ع. اوختاي`ين کتابينا اونون «ايشيق» شئعرينين آدي وئريلميشدير. بو دا تصاديفي دئييلدير. شاعير بوتون عؤمور بويو هميشه ايشيغا، آيدينليغا دوْغرو قوشموش، اطرافينداکيلاري دا نورلو گونلره سسله‌ميشدير. بيز اينانيريق کي, اونون وطن ائولادلارينين قلبينده يانديرديغي ايشيق هئچ واخت سٶنمهيه‌جک و گئتديکجه داها گور شٶعلهلر ساچاجاقدير!
0 Comments:
Post a Comment
<< Home