چال آشيق
چال آشيق سازيني، اوره ييم دولوب
بعضن اينسان ايچون درمان بو اولور
سازين نغمه لري آخسين كونلومه
يوخسا چيچكلريم عطشدن سولور
چال آشيق سازيني، بلكه سازيندا
اومودسوز حياتا بير اوميد تاپيم
گل آشيق سازيندا صبيردن دانيش
بلكه دؤزمك درسين آغزيندان قاپيم
بيليرسه ن آي آشيق درديميز بيردير
گل گئده ك سازيندا عشقدن دانيش
سيملرين ديلي ايله خالقي هارايلا
گل بو درده منله بيرليكده يانيش
گل آشيق بو آخشام داغلار باشيندا
نغمه لر سؤيله يه ك گوزللر ايچون
گل آشيق بو آخشام آشيق اولانا
دئيه ك غم چكمه يين دولدوروب ايچين
سحره جك چاليب، اوخوياق آشيق!
بلكه اوره كده كي يارا بيتيشسين
چاخيرلاشيب چالاق اوجا سس ايله
قوي آشيق سسيميز يارا يئتيشسين
اولدوزلارلا اولاق بو گئجه همدم
اولكردن گل آلاق عئشق ايلهاميني
بو گئجه چاغيراق تام آشيقلاري
چاخيرا، چالقييا ييغاق هاميني
اينسان دردلريني گل سازيندا چال
دٶزوملو آشيقلاردان حيكايت ائت
گل، بيزه آي آشيق عئشق درسي وئر
اوميدسيز ساعاتدا درديميزه يئت
عليرضا نابدل ( اوختاي )
0 Comments:
Post a Comment
<< Home