ايشيق
آمان٬ آمان قارا تئللى كيبريتچى قيز
دامجى دامجى قارانليقدا تر تؤكه ن
اود يوردونون قيزيلجا داغلاريندان
ميليونلار تون گوگورت چكيب٬ سؤكگونه ن!
كرخانادا ائله كيبريت٬ يوكگونه ن!
كى ظولمتين كؤكون يانديريب٬ ياخسين
آمان٬ آمان سارى تئلى زنجانلى
آمان گؤزه ل پيچاقلار يونان اوغلان
آغ پولاددان٬ پولاد تكين سوموكدن
ائله كسگين پيچاقلار يونگونان كى
ييرتابيلسين ظولمون چيركين اوره يين
قيرسين اؤلوم قوشونون دا قانادين
بلكه چوبان آزاد چالسين توته يين
آمان٬ آمان٬ اوزاق كندده٬ اوبادا
اوجا بويلو خورما تئللى معلليم
ايشيق آچ قارانليق كيلاسلاردا
ايشيقليق آچ كيلاسلاردا توپلانان
آى اولدوزسوز او كيچيك دونيالاردا
كورلوق چكميش بالاجا اينسانلارين
اوددان ايستى٬ قاردان آيدين قلبينه
بشرييت سؤزون تكجه يازگينان
اينسانلارين قول قانادين باغلايان
گؤيلرده كى قورخو فيكرين پوزگونان
آمان٬ آمان گون گؤرمه يه ن توخوجو
ايلمك سالان٬ دفه دؤيه ن٬ آه چكه ن
چيراق تكين يانان قانين يانديران
كيرپيكلرى پيلته كيمى كؤزله نه ن
او نه دير هئى دويونلورسه ن٬ كسيرسه ن
اوره ك سسين بوغازيندا بوغورسان
بيرجه يول دا خالچاندا بير شكيل سال
باخانلارين ديزلرينى قوروتسون
بير شكيل سال اربابلارى قورخوتسون
ظاليملرين بارماقلارين دويونله
سولئيمان تك٬ قالخ اونلارى زنجيرله
قوى خالچانى ساتان آلان بيلسين كى
سنين ديلسيز اللرينده نه لر وار
خالچا اوسته باشماقلى يئرييه نلر
بيلسينلر كى ديلسيز دينسه نه قوپار
آمان٬ آمان رومدان گؤيچه ك اورمولو
گوموش تئللى٬ قوجامان چاخير چكه ن
كئچميشلرين اييين توتان كوپلرده
عئشقين دادين وئره ن چاخير چكگينه ن
قوى حياتين آغير يولون گئچه نلر
دينجه لسينلر اوزون بولاقلاريندا....
ائله چاخير چكگينه ن كى يانديرسين
دٶوره يى ده٬ اوره كده كى دردى ده
قوى چاخيرين بير چوخ سؤزلر آنديرسين
خالقيما كيم:"گول اكدى٬ خار دردى"دئ!
0 Comments:
Post a Comment
<< Home