نولاردي

عليرضا نابدل- اوختاي


نولاردي سن اٶز الينله
من وئرديييم قيزيل گولو قايتارايدين
دٶشون اوستده وورمايايدين!
نولاردي سن قويايدين كي
داملا داملا ارييه يديم سو اولايديم
دٶشونده كي قيزيل گولو ايسلادايديم!
آخشام ايكن
آلمالارين كٶلگه سينده
دؤنگه سينده گون باتارين
قيزيل گولو مندن آليپ دؤشون اوستده سانجاقلارا سالمايايدين!
تاسسوف كي
منيم قانلي قيزيل گولوم
محببتسيز بير قلب اوستده سولاجاقدير
من گئده ركن اوزاقلارا
تكجه او گول مني يادا سالاجاقدر.