چيينيمده يورغونلوق، دؤشومده يئته رليک
ائينيمده مين يارا، کؤنلومده مين آرزو،
آتيمين ديرناغيندا وطن.
ديرناقلار داشلارا چيرپيلا- چيرپيلا
اؤژلرين قانيني ياياراق داشلارا
يئتيشديم
يئتيشديم و پوزدوم سون اؤژون يوواسين،
قيزي دا قورتارديم.
قاراشين، قاراقاش، قاراتئل بير قيز
گؤزلري اولدوز.
اولدوزلار سسله ندي قارنقولوقدا
و اينسان چاغريلدي:
"بري گل آي قوناق
من قوملوق قيزي‌يام
واحه‌سيز چؤللرين يوموشاق تيکاني...
تئليمدن آلاچيق قورارام
قولومو ياسديغين ائده‌ره م
گؤزلريم نور ساچار
دؤشلريم دويورار سن يورغون قوناغي
گئجه‌له ن"!
تئل‌لردن آلاچيق، دونوندان دؤشمه
قولوندان ياسديقجا قاييردي
واحه‌جيک قوردوق بيز.
من تورکمان آتيمي بوراخديم باييرا
قيلينجي آتا‌به ي باغيندا ايتيرديم
آنامين تيکدييي پاپاق دا يوخ اولدو
گلديييم يوللاري اونوتدوم.
سيلديم ده کؤنلومه ياييلان کئچميشي
حاليم بئله اولدو.
من اونو اردبيل خالچاسي ساياغي تکين
ايپکدن توخودوم؛
اريشي ماردان، آرقاجي اؤوره‌دن،
ايلمه‌سي ناخيشدان، گولوش‌دن؛
بير كول‌دا قيزيل گول
تيکاني دؤيوشدن، چيچه‌يي باريشدان؛
بير کول‌دا قيلينج،
بير کول‌دا آغارچين،
بير کول‌دا گؤورچين...
من اونو اردبيل خالچاسي تکين
ايپکدن توخودوم،
توخودوم و سالديم کؤنلومون تکينه؛
دايانديم آخشامين يولو اوسته
سسله نديم:
"بري گل قاراشين
من قيپچاق اوغلويام،
بؤلگه‌لي داغلارين سيلديريم قاياسي
گؤزومون اوستونو ياتاغين ائده‌ره م،
ديزيمي اوتاغين،
قولومو قالخان تک چکه‌ره م اوبايا
قوروسون سئوگيمي،
داماردان توخونان خالچادا سالينار
گله‌جک گونلرين تکينه
دوست اولاق!"
"داشليقدا گله رکن کند يئريشيي‌له
هؤروک‌لر بورولسون، قيوريلسين، آتيلسين
بيرجه بستي يوخدور چيينينده دورايدي
بولاغين يولو ايله گئده‌ر اولايدين.
آخشاملار اوغلان- قيز هالاي گئده‌ايديک
عاشيقين چؤگورو ناغيل دئيه‌ايدي
پاپاقلي کندلي‌لر چپيک توتايدي."
دايانديم آخشامين يولو اوسته
بير يول‌دا چاغيرديم: "بري گل قاراشين سئوگيليم!"
اوندا قاش قارالدي
تکجه اؤز سسيمي ائشيتديم داشلاردان
اوندا يئل باشلادي قارا يئل
قارا يئل...
بو قارا سسي ده يئل يئتيردي منه:
"سن باشي پاپاقلي اوباني ايستيرسه ن
سن آغزي ياشماقلي کندلري ايستيرسه ن
قيزيمي وئرمه‌ره م آيريليق سئوه‌نه"
دايانديم
آيريليق دئميشه م يوخسا من؟
آيريليق دئميره م، بيز بيريک
او مني چاغيردي، او سئودي، سئويشديک.
تانري‌لار
آي آلتميش آلتي‌لار
سيز دئيين...
دايانديم و دؤزدوم "آت ايل"دن آت‌ايله
يئنه ده آتيلان آتيله
يئنه ده...
گون دوشدو يانديرسين، يانماديم،
يئل اسدي کؤکومدن قوپارتسين، قوپماديم،
گلدي سئل آپارسين، گئتمه‌ديم،
دايانديم، قورودوم، اؤزومسوز واحه‌ني؛
دايانديم گئجه‌نين قاپيليغيندا
سسله‌يه م قيزي
سسله‌يه م يازي
سسي ده سسله‌ديم
سؤزو ده سسله‌ديم
و بوتون عالمه هاراي ياغديرام
و بوتون عالمي ياغديرام قاپي‌يا.
قاپيليق قارا‌ايدي ... من قارانليق گؤردوم
و آغير توستولر؛
يارديم من توستونو، ياريلدي
سؤکدوم ده تالواري، سؤکولدو؛
نه گؤردوم اوندا من ...
ساغينا، سولونا اؤژجوک‌لر دوزولموش:
قانلي اؤژ
پاپاغيم باشيندا
قيلينجيم بئلينده
آياغي آتيمين اوزنگي‌سينده ايدي.
-------------
· يئته رليک: فاتيح‌ليک
· قارانقولوق: قارانليق
· مؤوره: مؤو بوداغي‌نين کسيلميشينه دئييرلر.
· هالاي: رقص آدي
· چؤگور: عاشيق سازي
· قاپيليق: دروازا
· تالوار: حيصار
· اؤژجوک: کيچيک دئو
0 Comments:
Post a Comment
<< Home