قورد و شهه ر

قارلي کاسکئت باشيمدا وار،
جيم-‌جيلاق لوت،
قوينومداکي ياش کيتابلار.
شاختا ... شاختا ....
بير ده آغير نفس‌ ايدي،
من ايديم.
داش دؤشه کلي کوچه‌ميزده
زاغ- زاغ اسه ن ائولر ‌ايدي،
پالچيقلانميش قار ‌ايدي
بيز ايديک.
هر آچيشقا- قاباغيندان بيز کئچه نده، آچيليردي:
"قورد وار، قورد وار
يئيين اولون آي اوشاقلار..."
داليميزجا باغلانيردي...

صاباحکي گون من گؤردوم کي،
قوجا شهه ر
بؤلوک- بؤلوک
تيکه- تيکه
گئده ر- گلمه ز کاميونلارا مينديريلير...

من ائوميزه قاييداندا
آچيشقالار يئنه بير – بير آچيليردي:
"قورد وار، قورد وار، آدامجيل قورد،
ائولر ييخان، آغ بيرچکلي آنالاري آغلار قويان آدامجيل قورد.
بيزه سيلاح، بيزه سيلاح!"

اوچونجو گون
من ائوميزه قاييداندا
آچيشقالار آچيلديلار يئنه بير- بير:
"ساکيت! ساکيت! آستا گئدين!
سس چيخماسين دوداقلاردان!
قورقوشوم‌تک هاوا آغير،
دانيشجاغين دولور آغيز..."
- شهه ر قوردون قارنيندايدي.

27/8/1345